O conselleiro de Economía, Emprego e Industria, Francisco Conde, sinalou hoxe na súa visita ás instalacións en Bergondo do obradoiro de xoiaría Ardentia que esta empresa con preto de 30 anos de traxectoria demostra que a calidade e a innovación sen perder a esencia son claves para que a Artesanía de Galicia se dea a coñecer por todo o mundo.

Así mesmo, sinalou que Ardentia, finalista na primeira edición dos Premios Artesanía de Galicia, é un referente do sector artesán galego, e un exemplo de como o sector non é só unha parte fundamental do patrimonio cultural galego senón que contribúe de xeito importante á creación de riqueza e emprego na comunidade. Así, Galicia conta con máis de 500 talleres artesanais, un 20% máis que en 2012, e máis de 5.000 empregados.

Tal e como sinalou o conselleiro, os artesáns galegos son conscientes de que o camiño a seguir pasa pola internacionalización, abrir novas canles de negocio, a innovación e a profesionalización tanto desde o punto de vista da calidade como da xestión empresarial. Neste sentido, destacou que o taller artesán que dirixe Luís González Bahamonde, ademais de vender en tendas de toda Galicia, vende en internet e en países como Italia, Estados Unidos ou Emiratos Árabes Unidos.

Do mesmo xeito, Conde apuntou que a empresa, que conta coa marca Artesanía de Galicia, que dá a coñecer por todo o mundo a través da súa participación en diferentes feiras nacionais e internacionais, está tamén avalada polo distintivo de Galicia Calidade.